إزاي تعمل منشن أو تاج من الموبايل

بسم الله الرحمن الرحيم

وعليه توكلنا وبه نستعين

بناء على طلب الجماهير :)

قلت أشارككم الطريقة دي عشان اللي بيستخدم الموبايل كتير ونفسه يقدر يعمل منشن أو تاج لأي حد من أصدقائه أو لبيج أو حتى جروب

بس مبدئيا في الغالب هتحس إنها طريقة غلسة وطويلة وعشان كدة محتاج موبايل حديث شوية عشان يقدر يساعدك أو متصفح ويب كويس

وده مش بإيدي بقى معلش, لما أعرف طريقة جديدة مختصرة إن شاء الله هبلغكم

ملحوظة: أحيانا بأضطر أكتب نطق كلمة إنجليزي بحروف عربي عشان النوت ماتتلغبطش

أولا: صيغة التاج أو المينشن في أي مكان على الفيس هي كالآتي

@[ProfileID:]

ثانيا: إيه البروفايل آي دي ده؟

كل بروفايل ليه رقم تعريفي خاص به وهقولك تجيبه إزاي لكن مش هينفع كل ماتعوز تعمل تاج لحد تروح تدور على رقمه فعشان تسهل على نفسك إعمل نوت (أو أي حاجة تكتب فيها على الموبايل) وخزن فيها أرقام الناس اللي بتحتاج تعملهم تاج أو مينشن كتير وكل ما توصل لرقم فريند عندك خزنه فيها مش هتخسر حاجة وهتريحك بعدين

ثالثا: البروفايل آي دي ده تجيبه منين؟

هتفتح بروفايل أي واحد صديقك وتشوف عنوان البروفايل فوق

1-

لو هو مكتوب بالشكل ده

facebook.com/profile.php?id=1763097032

يبقى الرقم اللي بتدور عليه هو اللي مكتوب ده, يعني لو عاوز أعمل منشن لصاحب البروفايل ده هكتب

@[1763097032:]

2-

لو صديقك عامل يوزرنيم والرقم اللي انت عاوزه مش موجود زي بروفايلي مثلا
www.facebook.com/DrShadi
أو على الموبايل
m.facebook.com/DrShadi
تعالي في العنوان برضو وشيل ال
www أو ال m
وحط مكانها كلمة
graph
وإنتر ، يعني هيبقى بالشكل ده
https://graph.facebook.com/DrShadi
هيفتحلك صفحة فيها بيانات البروفايل وهتلاقي الآي دي بين قوسين كدة
"id": "1763097032",
يعني الآي دي هنا
1763097032

وارجع بقى استخدمه في صيغة المنشن

يعني وانت بتكتب التعليق (الكومينت) وهتعمل منشن لصاحب البروفايل ده هتكتبه كدة

@[1763097032:]

طبعا كل الخطوات دي بيكون أول مرة بس والمفروض تخزنه عندك بأي طريقة عشان تكتبه بعدين

يعني كل ما تجيب رقم آي دي بتاع صديق تسجله في "ملاحظة" أو Note عندك تجمع فيها الأرقام كلها

ملحوظة: ممكن تلاقي في عناوين الصفحات دي اللي بتجيب منها الرقم إضافات كتير سواء أرقام أو حروف لكن دي كلها زيادات مالهاش لازمة دور على اللي مكتوب هنا بس

والنوت دي مفتوحة للجميع لو عندك مشكلة في الموضوع ده اكتبها هنا وأنا أساعدك

والحمد لله الذي هدانا لهذا وما كنا لنهتدي لولا أن هدانا الله

بتاريخ 15 سبتمبر 2011