طريق الطبيب المصري

 

هو الطب كام سنة بالظبط؟! ايه هو الامتياز، التكليف، النيابات، يعني ايه نيابة بوست أو من غير بوست؟ هتخصص امتى؟
هحاول هنا أوضح إجابة الأسئلة دي باختصار. كان المفروض تتشرح بشكل أحسن من كدة في إحدى فقرات اللقاء اللي نظمه برلمان سنة تانية طب إسكندرية عن المستقبل وللأسف في حد في إدارة الكلية أو الجامعة قرر يلغيه قبلها بكام ساعة!

لازم تفهم طريقك ماشي إزاي عشان تعرف تخطط له صح من دلوقتي عشان ماتجيش تتفاجئ بنقطة عاوز تعمل فيها حاجة لكن فات وقتها من غير ما تاخد بالك
في موضوع تاني كبير عن الزمالات والمعادلات وطرق السفر للخارج محتاج حد أدرى مني بيه يكلمكم فيه إن شاء الله أنا هتكلم عن الطريق التقليدي داخل مصر

وقبل ما تتفاجئ بكل الرغي ده ممكن تطنشه لو ماعندكش طاقة تقراه وإقرا بس أول 6 جمل دول

• - سنوات الدراسة 6 سنين وسنة التخرج تساوي سنة دخول الكلية 6 مش 7
• - بعدهم الامتياز 12 شهر تدريب في مستشفيات الجامعة
• - بعدهم تبدأ التكليف وتشتغل طبيب ممارس عام في وحدات الصحة لغاية ما تستلم النيابة أو تدخل الجيش
• - بعدها النيابات ودي بداية التخصص الفعلي. إما تجيلك نيابة جامعة بعد 4 شهور تقريبا من نهاية الامتياز وإما تاخد نيابة في الصحة بعد قضاء سنة في التكليف
• - نيابة جامعة ببوست معناها إنك تكمل في القسم ده لغاية ما تبقي أستاذ دكتور، ومن غير بوست معناها هتبقي نائب جامعة 5 سنين بعدين ترجع الصحة
• - الجيش بيكون بعد ما تخلص امتياز إما ب6 شهور أو سنة لو أخدت نيابة جامعة هتبقى عسكري سنة واحدة ولو كملت في الصحة هتبقى ظابط 3 سنين

شوف الخريطة الزمنية دي وافهمها وكدة خلاص مش محتاج تقرا كل اللي جاي ده:D

الخريطة الزمنية لدفعة 2021 حتى النيابات

----------------------------------------------------------------------

اللي عاوز يستزيد بقى يركز في الشرح ده ويتابع على خريطة الوقت اللي فوق دي ...

الدراسة

نبدأ بالمفاجأة :D
سنوات الدراسة في أي كلية طب هي 6 سنوات دراسية. وفعليا دول بياخدوا فترة زمنية 6 سنوات وكام شهر. والدفعة في مصر كلها بتاخد اسم السنة اللي بدأت فيها امتحانات نهاية السنة السادسة.
يعني سنة دخول الكلية بتزود عليها 6 مش 7 زي ماهو معتاد وهيبقى ده اسم دفعتك
مثلا الدفعة الجديدة اللي هيدخلوا الكلية في شهر 9 سنة 2015 امتحاناتهم النهائية حسب المعتاد حاليا هتبقى في أكتوبر 2021 فاسمهم إن شاء الله دفعة 2021 مش 2022 :D

خلصتوا امتحانات السنة السادسة على خير بعدها بكام شهر تعلن نتيجتها وتتاح التظلمات
بعدها هتطلع نتيجة المجموع التراكمي (مجموع درجاتك في ال6 سنين كلهم) والترتيب العام
الكل بيترتب بقى من الأول لغاية آخر واحد في الدفعة بالمجموع التراكمي ده والتقدير العام
التقدير العام بناء على المجموع التراكمي سواء ممتاز ، جيد جدا ، أو جيد أو مقبول بيكون فيه حاجة كمان اسمها مرتبة الشرف، مثلا تقدير امتياز مع مرتبة الشرف معناه إن مفيش ولا سنة من ال6 قل تقديرك عن امتياز، تقدير جيد جدا مع مرتبة الشرف معناه إن مفيش ولا سنة من ال6 قل تقديرك عن جيد جدا
المجموع والترتيب ده بقى هيفرق معاك في كل حاجة تقريبا جاية في طريقك. مش بأبالغ لما أقول لعشرات السنين قدام (ما ذاكرتش من الأول ليه :D )

كدة انت اسمك خريج دفعة 2021 طب الإسكندرية.

----------------------------------------------------------------------

الامـــــتـــــياز

سنة تدريب إجبارية لكل خريجي كليات الطب مطلوبة في الداخل والخارج عشان يعتد بشهادتك. بمعنى انك دلوقتي لو عاوز شهادة من الكلية هتاخد "شهادة تخرج مـــؤقـــتة"
سنة الامتياز 12 شهر بالتمام والكمال
بتقضي السنة في دورات تدريبية Rotations كل روتيشن شهرين في أقسام الباطنة والجراحة والنسا وتوليد والأطفال والأقسام الخاصة وشهر استقبال وطوارئ وشهر تخدير
بتشتغل طبيب إمتياز في مستشفيات الجامعة الرئيسي (الميري) والشاطبي والحضرة (ناريمان) حسب التخصص
طبيب بجد لأول مرة بتتعامل مع المرضى في العنابر والعيادات ومسئول عنهم ومتابعة علاجهم ونباطشيات نهار وليل. ده له قعدة تانية بقى وقتها بتفاصيل اكتر والحمد لله سنة ورا سنة وضع أطباء الامتياز بيتحسن وبيتطور التدريب لصورة أفضل
ممكن تقضي جزء من الامتياز في مستشفيات جامعة تانية أو في مستشفيات وزارة الصحة في أي محافظة. وممكن تقضي كذا شهر منه في دولة تانية خالص تتدرب على تخصص معين على حسابك
كل ده له شروط وإجراءات وقواعد خلي تفاصيلها لوقتها برضو

الامتياز يبدأ في المعتاد للدفعة كلها في 1 مارس بعد ظهور النتيجة

يعني الدفعة اللي بنتكلم عنها 2021 دور أكتوبر هتبدأ امتياز في 1/3/2022 وهتخلصه في 28/2/2023
نفس الدفعة اللي اتأخر للدور التاني وعليه مواد ونجح هيبدأ امتياز متأخر 6 شهور يعني هيبدأه في 1/9

خلصنا إمتياز الحمد لله

كدة تعتبر اتخرجت فعليا أخيرا معاك "بكالوريوس الطب والجراحة" أو

MBBCh ; Medicinae Baccalaureus, Baccalaureus Chirurgiae

وبتتعمل حفلة التخرج الرسمية أخيرا
هتنضم لنقابة الأطباء وتعمل "ترخيص مزاولة المهنة" ومهنتك "طبيب بشري - ممارس عام"ـ

General practitioner (GP)

** بعد الامتياز ممكن تغير طريقك المعتاد كله وتمشي في طريق الضباط المتخصصين (جيش وشرطة) لكن هوضحه في الآخر خلينا الأول في الطريق العادي

----------------------------------------------------------------------

التــــكـــــلـــيف

هو فترة عمل إجبارية لأي طبيب عاوز يشتغل ويكمل في وزارة الصحة. بتتوزع فيها على الوحدات الصحية ومراكز طب الأسرة ومكاتب الصحة.
وفيه نوعين رئيسيين. إما بتتوزع على وحدة داخل المدينة وإما بتتوزع (غالبا باختيارك) على المناطق النائية زي المحافظات الحدودية (مطروح وسيناء والبحر الأحمر إلخ) وبعض المناطق الصحراوية . طيب ليه واحد هيروح باختياره الأماكن دي؟ لها مزايا مالية وإدارية ومزايا متعلقة بالنيابات هتعرفها بعدين
في آخر شهرين في الامتياز (يناير وفبراير) الدكاترة من خريجي نفس الدفعة على مستوى الجمهورية كلها بيسجلوا رغبات التكليف على النت في مكان واحد. والرغبات لها قيود في ترتيبها بالأقاليم بالظبط زي رغبات الكليات في الثانوية العامة. هتسجل الرغبة الأولى إدارة كذا والرغبة التانية إدارة كذا ثم إدارة........ لغاية ما تسجل إدارات مصر كلها من سيناء لمطروح ومن اسكندرية لأسوان كلها إجباري

بالإضافة لرغبات إختيارية اسمها "جهات خارجية" بتشتغل طبيب تكليف في مستشفيات التأمين الصحي وبنوك الدم وشركات حكومية زي النقل والطيران والكهربا وغيرها
وترتيب الإدارات اللي تناسبك فيه كلام كتير مش مكانه هنا. الإدارة هي الجهة الإدارية اللي تتبع لها عدد من الوحدات في جزء كبير من المحافظة.
بعدها بشهر تطلع النتيجة كل واحد اتوزع على إدارة إيه. دفعتنا كلها تقريبا اتوزعت في الأماكن اللي اختاروها وماراحوش أماكن بعيدة إلا بإختيارهم.
الطبيبة المتزوجة (حتى لو متزوجة مش طبيب) من حقها تاخد الإدارة اللي تختارها أيا كانت وأيا كان مجموعها وفي الوحدة الأقرب لها كمان

بعد إعلان النتيجة تبدأ إجراءات استلام التكليف لغاية ما تستلم العمل فعليا في إحدى الوحدات الصحية التابعة للإدارة اللي طلعت لك. غالبا في شهر ابريل

كدة انت طبيب بشرى في وزارة الصحة أخيرا
شغلك "ممارس عام" بتعالج الحالات المرضية الشائعة وتحول الحالات الأكبر منك لأخصائيين
ومسئول عن مهام أخرى تبع طب الأسرة وصحة المجتمع خليها لوقتها

في نوع مختلف من التكليف وهو تكليف الجيش والشرطة بتقدم عليه ولو اتقبلت بتشتغل طبيب تكليف مدني في مستشفيات الجيش والشرطة وده يغني عن تكليف الصحة

لها مزايا وعيوب مختلفة بتقارنها لنفسك وقتها

----------------------------------------------------------------------

النــــــيابـــــات

بعد التكليف اللي هتختلف مدته حسب طريقك تأتي النيابات
النيابات سواء في الجامعة أو الصحة هي بداية طريق التخصص. كل قسم فيه استشاريين وأخصائيين ومعاهم نواب من 4 أو 5 دفعات متتالية. انت مثلا هتبقى نائب جراحة عامة في مستشفى رأس التين أو نائب باطنة في نفس المستشفى، أو نائب أطفال في الجامعة أو نائبة نسا في دار إسماعيل وهكذا. انت لسة رسميا مش أخصائي لكن هنا بتبدأ تتعلم التخصص اللي عايزه وتحضر الماجستير فيه.

لغاية استلام التكليف كل الناس ماشية في نفس السكة والخطوات فيما عدا اللي سافر برة مصر وهيكمل هناك
يبدأ التفرق مع اعلان معاد قعدة نيابات الجامعة وهنا في طريقين كبار

- أول 300 "تقريبا" على الدفعة
انت استلمت تكليف في شهر 4 غالبا هتفضل فيه لغاية قعدة النيابات حسب إعلان الكلية
الجامعة بتعلن انها محتاجة مثلا 200 وشوية طبيب مقيم في الأقسام المختلفة. مثلا الجراحة 20 والباطنة 20 والأطفال كذا والنسا كذا وأنف وأذن كذا وأشعة كذا ورمد كذا ...... إلخ لكل الأقسام. بالإضافة لنيابات في معهد البحوث الطبية والمعهد العالي للصحة
وال20 جراحة دول مثلا فيهم 4 بـ post و الباقي من غير بوست. والأطفال 5 منهم لهم بوست والباقي لأ. اللي لهم بوست معناها إنه هيكمل في الكلية معيد ويتدرج بقى في ال staff لغاية ما يبقى أستاذ دكتور.
أما الباقيين اللي من غير بوست معناها إنهم بعد ما يخلصوا نيابة الجامعة "" 5 سنين "" بيرجعوا وزارة الصحة ويكملوا باقي حياتهم فيها كمساعد أخصائي ثم أخصائي ثم استشاري
في شهر 7 غالبا هتقعدوا كلكم في قاعة واحدة معروض قدامكم على شاشة كبيرة التخصصات المتاحة ببوست ومن غير بوست
وهتطلعوا بالترتيب العام واحد واحد، هيقف الأول على الدفعة يقول مثلا "رمد" فيتشطب على مكان من المتوفرين في الرمد
يطلع الثاني بعده يقول "قلب" فيتشطب على مكان من المتوفرين في القلب
يطلع الثاني بعده يقول "أطفال" وهكذا بالترتيب
لغاية ما نوصل لواحد هو عاوز أطفال مثلا لكن في 5 قبله أخدوا أطفال وبالتالي ماعادش "أطفال ببوست" فهنا عنده الإختيار بقى إما ياخد أطفال من غير بوست يتعلم التخصص اللي عايزه في الجامعة بعدين يرجع الصحة أو يشوف نيابة تانية ببوست مش أطفال عشان يكمل في الجامعة حتى لو تخصص تاني. أحيانا في ناس بتسيب جراحة وباطنة وأطفال وتاخد تخصص أكاديمي بحت لأنه مش عايز يسيب الجامعة وفي العكس قدامه تخصص حلو جدا ببوست ويسيبه لأنه عاوز تخصص معين ماينفعش غيره أو حتى ما ياخدش نيابة أصلا ويبدأ النيابة في وزارة الصحة
وصلنا لغاية ما كل النيابات خلصت واتوزعت غالبا على أول 300 في الدفعة والاستلام الفعلي بيكون بعدها بشوية
طبعا اللي تروح عليه نومة يومها يبقى يستاهل الي يحصله :D راحت عليه كدة
في برضو حاجة اسمها waiting مش مشكلة الكلام عنها دلوقتي :)

- باقي الدفعة
انت استلمت تكليف في شهر 4 غالبا وترتيبك ميجيبش نيابة جامعة أو رحت قعدة النيابات وما أخدتش نيابة
هتكمل في التكليف لغاية ما تنزل نيابات الصحة في شهر 5 اللي بعد اللي بعده
يعني بعد ما تقضي سنة تقريبا في التكليف بتنزل حركة نيابات مايو بالنيابات المتاحة في مستشفيات مصر كلها
نفس اللي عملته في التكليف كل الدفعة في مصر كلها هتسجل رغبات النيابة على موقع الوزارة، مثلا انت في الوقت ده كنت قررت عاوز جراحة عامة خلاص فهتسجل رغباتك
1- جراحة عامة مستشفى جمال عبد الناصر
2- جراحة عامة مستشفى دمنهور التعليمي
3- جراحة عامة مستشفى كفر الشيخ العام
4- جراحة عامة مستشفى رأس التين
نفترض انت كنت سألت عن التخصصات المختلفة وأماكنها وقررت إن لو ماجاتش ليك نيابة في ال4 أماكن دول هتاخد تخصص تاني أو جراحة تخصصية في أماكن تاني ولو ماجاتش النيابات دي كمان فخلاص بقى عاوز جراحة في أي حتة وخلاص، فهتكمل الرغبات برضو في نفس الصفحة
5- باطنة مستشفى دمنهور التعليمي
6- جراحة تجميل مستشفى أحمد ماهر التعليمي
7- جراحة عامة مستشفى كفر الدوار العام

يعني بتسجل أي تخصص في أي مكان من النيابات المتاحة مش مقيد بأي حاجة
الحاجة الوحيدة اللي هتفرق معاك هي مجموعك لأنه هيحكمك مقارنة بكل زملائك على مستوى الجمهورية، يعني لو واحد من أسوان عاوز جراحة عامة جمال عبد الناصر ومجموعة أعلى منك يبقى هو اللي ياخدها وهكذا
وممكن تكتب أي عدد من الرغبات مثلا 5 رغبات بس بمعني لو ماجاتش النيابة من ال5 دول هتستنى حركة النيابات اللي بعدها

بعد تسجيل الرغبات وظهور النتيجة بتبدأ تستلم النيابة على طول وتبدأ بقى طريق التخصص ربنا يعينك
نيابة الصحة 4 سنوات المفروض بنهايتها تكون أخدت ماجستير وبتكمل بقى في طريق الأخصائي

نيابات نوفمبر
في بقى حركة نيابات تانية في شهر نوفمبر قبل الحركة الأساسية، يعني تقريبا بعد 6 شهور من استلامك التكليف
وفي الحركة دي مش بتكون كل الأماكن متاحة وبتكون أقل من حركة مايو لكن بيكون فيها أماكن كويسة كتير برضو
الدكاترة اللي تكليفهم في المناطق النائية بيقدموا على أي نيابة في الحركة دي، ودي أحد مزايا التكليف النائي
الدكاترة اللي تكليفهم مش نائي من حقهم يقدموا فـــــقــــط على "التخصصات الملحة" من الحركة، ودي تخصصات بتحددها الوزارة بناء على عجز عدد النواب في التخصصات دي، يعني مثلا من كل التخصصات اللي هتعلن: الدكاترة دول ما ينفعش يقدموا غير على نيابات (الجراحة العامة، الباطنة العامة، العظام، التخدير، استقبال وطوارئ، تخدير، عناية، جراحة مخ وأعصاب وأخرى) أما باقي النيابات يقدم عليها فقط المكلفين في مناطق نائية أو لو واحد أقدم منكم كمل في التكليف سنة
في كل الأحوال حتى لو قدمت على نيابة في نوفمبر وجاتلك بتستلمها بعد ما تكمل سنة كاملة في التكليف مش قبل كدة يعني بتقعد 6 شهور كمان في التكليف لكن من أول ما تطلع النتيجة ممكن تبدأ تحضير الماجستير في التخصص اللي جاتلك فيه النيابة حتى وانت لسة طبيب تكليف

كل اللي فات ده لزملائنا اللي مالهمش جيش أو زميلاتنا
____________________________

اللي لهم جيش بقى

نص أول (مولودين ابتداء من 1 يناير حتى 30 يونيو) ونص تاني (مولودين ابتداء من 1 يوليو حتى 31 ديسمبر)
لغاية ما تستلم تكليف كانت الكلية بتأجل تجنيدك
بعد ما استلمت هتستنى دورك بقى،
النص الأول بيبدأ إجراءات التجنيد بعد شهر 6 وبيدخل الجيش فعليا في شهر 10 (بعد 5 شهور في التكليف تقريبا أو بعد استلام نيابة الجامعة على طول)
النص التاني بيبدأ إجراءات التجنيد بعد شهر 12 وبيدخل الجيش فعليا في شهر 3 (بعد 11 شهر في التكليف تقريبا أو بعد استلام نيابة الجامعة بكام شهر)
الأطباء اللي مكملين في الصحة: الغالبية العظمى بيدخلوا ظباط يعني 3 سنين خدمة عسكرية (وقت فعلي تقريبا سنتين ونص) ولو دخلوا قبل ما يكملوا سنة في التكليف بيعتبرالجيش استكمال للتكليف وبيقدموا على حركة النيابات مع زملائهم لكن بيجمدوا النيابة وبيبدأوها بعد الجيش ولو اشتغل في الجيش طبيب في نفس التخصص اللي جاتله فيه النيابة ممكن يتحسب له الفترة دي من نيابته عشان يوفر وقت وممكن يقدم على الماجستير كمان
كل الأطباء اللي بدأوا نيابات جامعة بيدخلوا عسكري يعني تقريبا سنة لكنها محسوبة من ال5 سنين نيابة مش بتتأجل نيابته

ــــــــــــــــــــــــــــــــــــــــــــــــــــــــــــــــــــــــــــــــــــــ

** لو عايز تكمل طول حياتك كظابط جيش أو شرطة

بعد الامتياز ممكن تغير طريقك المعتاد كله وتمشي في سكة الظباط المتخصصين

يعني تكمل طول حياتك بقى ظابط طبيب

بعد الامتياز تقدم في الجيش (الأكاديمية الطبية العسكرية) أو الشرطة (أكاديمية الشرطة) وبتدخل اختبارات قبول مختلفة

لو اتقبلت بتدرس في الأكاديمية 6 شهور وتتخرج برتبة ملازم أول طبيب وبعد 6 شهور تبقى نقيب وتترقى بقى كل فترة محددة

الموضوع ده فيه مزايا كتير جدا خصوصا من ناحية التعليم والفلوس وإمكانيات بيئة العمل لكن فيه عيوب برضو معظم الناس مش هتقبلها خصوصا الجانب العسكري وطبيعة حياتك كظابط

____________________________________

المرتب والجانب المادي

الأول لازم أشير للجانب الكويس في الموضوع وهو إنك -كطبيب- من الفئة الوحيدة (مع كل خريجي الكليات الطبية) اللي الحكومة ملزمة بتعيينهم في مؤسساتها بالقانون يعني تتخرج وتشتغل في الحكومة على طول. ودي ميزة عن كل الكليات العالية مش هيعرف قيمتها إلا اللي اتخرج من "كلية قمة" وقعد على القهوة مش لاقي شغل. عشان كدة في محاولات جدية من الوزارة لإلغاء التكليف بقانون جديد ويخلوا نفسهم من الالتزام ده

طيب كام بقى مرتب الحكومة؟

• طبيب الامتياز بيقبض "مكافأة تدريب" شهرية 254 في أول 4 شهور و 275 جنيه باقي السنة

• طبيب التكليف في معظم المحافظات ابتداء من شهر 7/2015 بيقبض في الشهر من 2000 لـ 2300 جنيه. وده مقابل شغل 6 ساعات يوميا فقط أو ما مجموعه 36 ساعة في الأسبوع.

في المحافظات الحدودية (مطروح وشمال وجنوب سيناء والبحر الأحمر والوادي الجديد وأسوان) هيقبض حوالي 3500 جنيه شهريا على نفس ساعات العمل.
يضاف على ذلك لأي طبيب لو اشتغل زيادة عن ال36 ساعة (نباطشيات) بعد الساعة 2 أو بالليل بتختلف حسب مكان العمل ودي لها فلوس زيادة على المرتب الأصلي.

• نائب الصحة بيقبض تقريبا في نفس حدود طبيب التكليف لكن عشان نباطشياته كتير ممكن يزيد عنه من 300 لـ 600 جنيه
• والمرتب عامة كل سنة في شهر 7 بيزيد حاجة بسيطة. ومع كل درجة علمية جديدة ومع كل ترقية
• نائب الجامعة والأطباء في مستشفيات التأمين الصحي وبعض المستشفيات الكبيرة التابعة لجهة اسمها الأمانة من غير تفاصيل كتير بيقبضوا أقل من طبيب التكليف! لكن التعليم والتدريب فيهم أفضل بكتير من معظم مستشفيات الصحة وأكثر مرمطة برضو

ده الجانب الحكومي. إنما طبعا معظم الأطباء محتاجين يزيدوا دخلهم فبيبدأ يشتغل خاص private بجانب شغله الحكومي ابتداء من الشغل في المستوصفات والمراكز الطبية لغاية ما يفتح عيادته الخاصة أو يشتغل في مستشفى خاص هو وشطارته وعلاقاته
والجانب الخاص هو الجانب اللي بيجيب الفلوس اللي الناس فاكراها كتير :D

____________________________________

أخدت بالك انت اتخصصت امتى؟

بعد 9 سنين تقريبا من دخولك الكلية! ولسة هتبقى مساعد أخصائي بعدها ب 4 سنين وأخصائي بعدها بكام سنة كمان

في نقطة مهمة كل ده بناء على النظام الحالي جايز لما ييجي دوركم حاجات تتغير وفي احتمال كبير لإلغاء التكليف أصلا بدأ بمحاولة حقيقية السنة دي لكن دفعتنا وقفت ضدها ونجحت في وقف مشروع إلغاءه وأكيد هيجربوا مع دفعات لاحقة، وكمقدمة ليه عملوا السنة دي حاجة جديدة وهي إن بعض التخصصات أتيحت للتكليف، بمعني مش هتروح وحدة صحية خالص وهتبدأ في تخصص على طول أبرزهم التخدير والطوارئ والعناية، وإن كان ده في حد ذاته على المستوي الشخصي كويس جدا لكن على المستوى العام والمصلحة العامة مضر جدا لباقي الدفعة وللدفعات السابقة واللاحقة فلسة هنشوف هيوصلوا لإيه

____________________________________

أتمنى أكون وضحت أهم النقط قدر الإمكان ومعلش على الرغي الكتير ده أنا كل ده وماقلتش إلا الحاجات المهمة بس وما اتكلمتش عن تفاصيل فرعية كتير جدا
ولازم تعرف إن ده الطريق التقليدي العادي وفي نقط كتير ممكن تتفرع فيها لطريق تاني تثبت فيه كفاءتك وتحسن من فرص النجاح في مستقبلك فما تقفلش أي باب من غير ما تفهم اللي وراه كويس

ده غير طريق التخصص ممكن تبدأه من وانت في امتياز وتطور نفسك فيه من قبل ما تستلم النيابة

وطبعا ما تنساش تطور من نفسك علميا بشكل عام وتدور على الزمالات والمعادلات وإيه اللي يفيدك منها خصوصا إنك ممكن تبدأ طريقها وانت لسة بتدرس

ربنا يوفقكم جميعا

____________________________________

إعلان حركة التكليف لدفعة 2013 وحركة نيابات نوفمبر 2014

جزء من إعلان جلسة نيابات مستشفيات جامعة الإسكندرية لدفعة 2013